1.

 

1.1.

Սույն Պայմանները սահմանում են «ՎիվաՍել-ՄՏՍ» և այլ ապրանքային նշանների ներքո գործող «Ղ-Տելեկոմ» փակ բաժնետիրական ընկերության (ստորև` «Օպերատոր») կողմից հանրային շարժական էլեկտրոնային հաղորդակցության ցանցի միջոցով Ծառայությունների մատուցման ընդհանուր պայմանները:

 

1.2.

Օպերատորի գովազդը կամ Ծառայությունների այլ կերպ ներկայացումը Պայմանների և որևէ սակագնային պլանի պայմանների համաձայն Ծառայություններին բաժանորդագրվելու օֆերտա (առաջարկ) կատարելու հրապարակային հրավեր է:

 

1.3.

Բաժանորդագրման օֆերտան համարվում է Օպերատորի կողմից ակցեպտավորված (հաստատված) Ծառայություններն ակտիվացնելու պահից, և այդ պահից օֆերտան և Պայմանները, համապատասխան սակագնային պլանի պայմանների հետ մեկտեղ, կազմում են Օպերատորի և Բաժանորդի միջև կնքված, կատարման համար պարտադիր պայմանագիր (ստորև` «Պայմանագիր»):

 

1.4.

Չհակասելով այլ դրույթներին` սույն Պայմանները հանդիսանում են Օպերատորի կողմից նախկինում կատարված հրապարակային օֆերտայի հիման վրա նույն առարկայի վերաբերյալ կնքված պայմանագրերի պայմանները 2011թ. սեպտեմբերի 10-ից փոփոխելու հրապարակային օֆերտա: Մինչև նշված ամսաթիվը Պայմանների վերաբերյալ գրավոր առարկություն և նախկինում կնքված պայմանագրի դադարման պահանջ չստանալու դեպքում սույն Պայմանները կհամարվեն Բաժանորդի կողմից գործողությամբ ամբողջությամբ ակցեպտավորված, եթե նշված ամսաթվից հետո բաժանորդը շարունակի օգտվել Ծառայություններից:

 

 

2.

 

 

Այնքանով, որքանով համատեքստից այլ բան չի բխում, Պայմանագրում օգտագործվող բառերն ու արտահայտություններն ունեն հետևյալ նշանակությունը.

 

«Անձնական հաշիվ». Բիլինգային համակարգում վարվող անալիտիկ հաշիվ, որն օգտագործվում է Բաժանորդից ստացվող վճարումների և նրան մատուցվող ծառայությունների հաշվառման համար:

 

«Բաժանորդ». ֆիզիկական կամ իրավաբանական անձ, որն ակցեպտավորել է սույն հրապարակային օֆերտան:

 

«Բաժանորդային սարքավորում». Օպերատորի շարժական ցանցի և SIM քարտի հետ համատեղելի հեռախոսային կամ այլ սարքավորում, որի միջոցով Բաժանորդը կարող է օգտվել Ծառայություններից:

 

«Բիլինգային համակարգ». հաշվարկների վարման ավտոմատացված համակարգ:

 

«Գաղտնաբառ». տառերի և/կամ թվերի համակցություն, որն օգտագործվում է Բաժանորդի (լիազորված անձի) նույնականացման համար:

 

«Ծառայություններ». Օպերատորի կողմից Պայմանագրի համաձայն մատուցվող շարժական էլեկտրոնային հաղորդակցության և հարակից այլ ծառայություններ: Օպերատորի կողմից նախատեսված դեպքերում` Ծառայությունները կարող են մատուցվել Օպերատորի կողմից նշված երրորդ անձանց կողմից: Բացի այդ, Օպերատորը հնարավորություն է ընձեռում երրորդ անձանց կողմից մատուցվող ծառայությունները Բաժանորդին հասանելի դարձնելու համար` նման երրորդ անձանց հետ հարաբերություններում հանդես գալով որպես Բաժանորդի գործակալ, որը գործում է սեփական անունից, սակայն Բաժանորդի հաշվին և հանձնարարությամբ:

 

«Կողմ». Պայմանագրի կողմ հանդիսացող անձ` Օպերատորը կամ Բաժանորդը:

 

«Հեռախոսի համար». համարագրման պլանի համար, որն օգտագործվում է շարժական ցանցում Բաժանորդի կամ այլ թույլատրելի օգտագործողի նույնականացման և Պայմանագրի համաձայն Ծառայությունների մատուցման նպատակով:

 

«Պայմաններ». սույն ընդհանուր պայմանները:

 

«Օպերատոր». սույն Պայմանների 1.1. կետում նշված ընկերությունը, որը պատշաճ կերպով հիմնադրված է Հայաստանի Հանրապետությունում և ունի հանրային էլեկտրոնային հաղորդակցության ծառայություններ մատուցելու համար անհրաժեշտ լիցենզիաներ և թույլտվություններ:

 

«SIM քարտ». տեխնիկական հարմարանք, որին վերագրված է Հեռախոսային համար և որը Բաժանորդի կողմից Բաժանորդային սարքավորման հետ միասին օգտագործվում է Ծառայությունները ստանալու համար: Օպերատորի կողմից Բաժանորդին տրամադրված SIM քարտը մնում է Օպերատորի սեփականությունը և այն չի կարող Բաժանորդի կողմից օտարվել երրորդ անձի: Ինքնին SIM քարտն առևտրային արժեք չի ներկայացնում: SIM քարտը նախատեսված է անհատական օգտագործման համար, եթե այլ բան նախատեսված չէ սակագնային պլանով:

 

 

3.

 

3.1.

Ծառայությունների նկարագրությունը, դրանց նկատմամբ կիրառելի սակագները, պայմանները և կանոնները սահմանվում են Օպերատորի կողմից:

 

3.2.

Ծառայությունները մատուցվում են Օպերատորի հանրային շարժական էլեկտրոնային հաղորդակցության ցանցի առկա տեխնիկական հնարավորությունների սահմաններում:

 

3.3.

Այլ բան սահմանված չլինելու դեպքում Ծառայությունները մատուցվում են շուրջօրյա, առանց ընդհատումների, տարվա բոլոր օրերին: Ծառայությունների մատուցումը կարող է սահմանափակվել կամ ընդհատվել վերանորոգման և տեխնիկական սպասարկման աշխատանքների իրականացման ժամանակ, որոնց մասին, հնարավորության դեպքում, Օպերատորը պետք է տեղեկացնի Բաժանորդին հրապարակային հայտարարություններ անելու միջոցով: Ծառայությունների մատուցումը կարող է ընդհատվել կամ Ծառայությունների որակը կարող է վատթարանալ տեխնիկական խափանումների դեպքում: Օպերատորը պարտավոր է ձեռնարկել անհրաժեշտ միջոցներ առաջացած տեխնիկական խափանումները վերացնելու համար:

 

3.4.

Ծառայություններից օգտվելու համար Բաժանորդը սեփական հայեցողությամբ և ծախսով ձեռք է բերում և օգտագործում է Օպերատորի կողմից և օրենսդրությամբ սահմանված պահանջներին համապատասխանող (եթե այդպիսիք սահմանված են), Օպերատորի հանրային շարժական էլեկտրոնային հաղորդակցության ցանցի հետ համատեղելի Բաժանորդային սարքավորում:

 

3.5.

Օպերատորն իրավունք ունի կիրառելու հատուկ պայմաններ կամ սահմանափակումներ իր կողմից վաճառվող և/կամ օգտագործման/տիրապետման իրավունքով տրամադրվող Բաժանորդային սարքավորումների նկատմամբ:

 

3.6.

Բաժանորդն ապահովում է Օպերատորի կողմից տրամադրված SIM քարտի պահպանությունը: Այն դեպքում, երբ Օպերատորը տեղեկացված չէ SIM քարտի կորստի կամ հափշտակման մասին, համարվում է, որ SIM քարտն օգտագործվում է Բաժանորդի կողմից կամ վերջինիս համաձայնությամբ և թույլտվությամբ:

 

3.7.

Ծառայությունների ստացման հնարավորությունը, դրանց տեխնիկական և/կամ որակական հատկանիշները կարող են կախված լինել Օպերատորի հսկողությունից դուրս գտնվող հանգամանքներից, այդ թվում` Բաժանորդային սարքավորման որակից և տեխնիկական առանձնահատկություններից, այլ օպերատորների ցանցերի անկանոն աշխատանքից, ռադիոալիքների տարածմանը և ռադիոսարքավորումների նորմալ շահագործմանը խոչընդոտող հանգամանքներից, տեղանքի առանձնահատկություններից և օդերևութաբանական պայմաններից:

 

3.8.

Մատուցվող ծառայությունների ծավալը կարող է սահմանափակվել Օպերատորի կողմից` Պայմանագրի և Օպերատորի կողմից սահմանված այլ կանոնների համաձայն:

 

3.9.

Տեխնիկական անհրաժեշտության կամ օրենսդրությամբ նախատեսված դեպքում Օպերատորը կարող է փոփոխել Հեռախոսի համարը` այդ մասին նախապես ծանուցելով Բաժանորդին:

 

3.10.

Բաժանորդին մատուցված Ծառայությունների ծավալը որոշվում է Բիլինգային համակարգի կողմից, այդ թվում` այլ ծառայություններ մատուցողների կողմից ներկայացված տվյալների հիման վրա:

 

3.11.

Օպերատորը պարտավոր չէ 3 (երեք) ամսից ավելի պահպանել մատուցված Ծառայությունների մասին տեղեկատվությունը:

 

 

4.

 

4.1.

Օպերատորը պարտավոր է

 

4.1.1.

Պայմանագրի գործողության ընթացքում Ծառայություններից օգտվելու համար Բաժանորդին հատկացնել Հեռախոսի համար և տրամադրել SIM քարտ, եթե տվյալ Ծառայությունից օգտվելու համար դրանք անհրաժեշտ են:

 

4.1.2.

Առկա տեխնիկական հնարավորությունների սահմաններում ապահովել Ծառայություններից օգտվելու հնարավորություն:

 

4.1.3.

Բաժանորդին տրամադրել տեղեկատվություն Օպերատորի շարժական ցանցի ծածկույթի, Բաժանորդի կողմից ընտրված սակագնային պլանով նախատեսված Ծառայությունների ցանկի, Ծառայությունների մատուցման պայմանների, մատուցված Ծառայությունների ծավալի և Անձնական հաշվի մնացորդի մասին:

 

4.1.4.

Բաժանորդի պահանջով տրամադրել մատուցված Ծառայությունների վերծանումները, ինչի համար Օպերատորը կարող է գանձել ծառայության վճար:

 

4.2.

Օպերատորն իրավունք ունի

 

4.2.1.

Պայմանագրով կամ օրենսդրությամբ սահմանված կարգով ինքնուրույն սահմանելու և ժամանակ առ ժամանակ փոփոխելու սակագնային պլանները, Ծառայությունների ցանկը, դրանց մատուցման պայմանները, սակագները և կանոնները:

 

4.2.2.

Կարճաժամկետ սահմանափակում կիրառելու Ծառայությունների ծավալների նկատմամբ` ելնելով տեխնիկական անհրաժեշտությունից:

 

4.2.3.

Բաժանորդի կողմից Պայմանագրի պայմանների խախտման դեպքում միակողմանիորեն կասեցնելու Ծառայությունները (դրանց մասը) կամ դադարեցնելու Պայմանագիրն` առանց որևէ ծանուցման:

 

4.2.4.

Բաժանորդի կողմից Պայմանագրի պայմանների խախտման դեպքում կիրառելու պատասխանատվության միջոցներ:

 

 

5.

 

5.1.

Բաժանորդը պարտավոր է

 

5.1.1.

Կատարել Պայմանագրի և Ծառայությունների մատուցման պայմանների և կանոնների պահանջները, հետևել դրանց փոփոխություններին:

 

5.1.2.

Ժամանակին վճարել Ծառայությունների դիմաց, իսկ նախատեսված դեպքերում կատարել երաշխիքային դեպոզիտ կամ կանխավճար:

 

5.1.3.

SIM քարտը պահպանել պատշաճ և ապահով վիճակում և չթույլատրել SIM քարտի օգտագործումը նման լիազորություն չունեցող անձանց կողմից:

 

5.1.4.

Չօգտագործել Ծառայությունները օրենքին հակասող նպատակներով:

 

5.1.5.

Առանց Օպերատորի գրավոր համաձայնության չօգտագործել Ծառայություններն էլեկտրոնային հաղորդակցության ծառայություններ մատուցելու, գովազդ կամ զանգվածային հաղորդագրություններ տարածելու, քվեարկություններ, վիճակախաղեր կամ մրցույթներ կազմակերպելու համար:

 

5.1.6.

Չօգտագործել SIM քարտը որևէ անհամատեղելի սարքի հետ և որևէ եղանակով, որը կարող է ազդել հեռահաղորդակցության ցանցերի կամ սարքավորումների ապահով և անխափան աշխատանքի վրա:

 

5.1.7.

Չօգտագործել SIM քարտը և Բաժանորդային սարքավորումը վայրերում, որտեղ դրանց օգտագործումն արգելված կամ սահմանափակված է (օրինակ` ավտոլցակայանում, օդանավում, մշակույթի օջախներում և այլն):

 

5.1.8.

Զերծ մնալ Ծառայությունների այնպիսի օգտագործումից, որի արդյունքում կարող են խախտվել Օպերատորի կամ այլ անձանց իրավունքները, կամ նրանց կարող է պատճառվել անհարմարություն:

 

5.1.9.

Անհապաղ տեղեկացնել Օպերատորին SIM քարտի կորստի կամ հափշտակման մասին` Օպերատորին ներկայացնելով SIM քարտի նկատմամբ իրավունքները և Բաժանորդի (լիազորված անձի) ինքնությունը հաստատող բավարար ապացույցներ:

 

5.2.

Բաժանորդն իրավունք ունի

 

5.2.1.

Օպերատորի մոտ տեխնիկական հնարավորության սահմաններում ստանալու տեղեկատվություն առաջարկվող Ծառայությունների, կիրառվող սակագների, մատուցված Ծառայությունների ծավալի, գանձված գումարների և Անձնական հաշվի ընթացիկ մնացորդի մասին:

 

5.2.2.

Օրենսդրությամբ կամ Օպերատորի կողմից սահմանված կանոններով նախատեսված դեպքերում և տեխնիկական հնարավորության սահմաններում հրաժարվելու Օպերատորի կողմից շարժական ցանցի միջոցով տարածվող գովազդային և/կամ տեղեկատվական հաղորդագրությունների ստացման հնարավորությունից, որն այլապես համարվում է տրված:

 

 

6.

 

6.1.

Ծառայությունների նկատմամբ կիրառվում են Բաժանորդի կողմից ընտրված սակագնային պլանի համար Օպերատորի կողմից սահմանված սակագները, որոնք հրապարակվում են Օպերատորի վեբ կայքում և ներկայացվում Օպերատորի սպասարկման կենտրոններում:

 

6.2.

Կախված սակագնային պլանից, Ծառայությունների դիմաց վճարումները պետք է կատարվեն կանխավճարային կամ հետվճարային եղանակով, ինչպես նաև կարող է պահանջվել երաշխիքային դեպոզիտ կամ այլ ապահովություն:

 

6.3.

Բաժանորդը պետք է անհապաղ գրավոր և/կամ Օպերատորի կողմից ընդունելի այլ եղանակով ծանուցի Օպերատորի համապատասխան ծառայություններին SIM քարտի կորստի կամ հափշտակության մասին, իսկ Օպերատորը պետք է շուտափույթ գործողություններ ձեռնարկի SIM քարտի սպասարկումը դադարեցնելու ուղղությամբ Բաժանորդի պատշաճ ծանուցումը ստանալու պահից սկսած 24 (քսանչորս) ժամվա ընթացքում: Բաժանորդը կրում է SIM քարտի կորստի, հափշտակման, վնասման (այդ թվում` բնական մաշվածության) հետ կապված ռիսկերը: Մինչև SIM քարտի սպասարկումը դադարեցնելը դրա տիրապետողին մատուցված Ծառայությունների համար հաշվարկված գումարները գանձվում են Բաժանորդից:

 

6.4.

Օպերատորը կարող է գանձել վճար կասեցված Ծառայությունները վերականգնելու, անջատված SIM քարտը վերամիացնելու, կորցրած/հափշտակված կամ փչացած SIM քարտը նոր SIM քարտով փոխարինելու համար:

 

6.5.

Տեխնիկական առանձնահատկություններից ելնելով` մատուցված որոշ Ծառայությունների համար գանձվող գումարները կարող են Անձնական հաշվում արտացոլվել ուշացումով (օրինակ` ռոումինգային ծառայությունների դեպքում):

 

6.6.

Բաժանորդի օգտին վճարում կատարող ցանկացած անձ համարվում է Բաժանորդի կողմից վճարման համար պատշաճ կերպով լիազորված և այդ լիազորության իրականացման նպատակով վերջինի անունից և համար գործող:

 

6.7.

Կանխավճարային բաժանորդագրության դեպքում, եթե այլ բան սահմանված չէ Օպերատորի կողմից.

 

6.7.1.

Ծառայությունները մատուցվում են Անձնական հաշվում առկա միջոցների և Օպերատորի կողմից սահմանված ժամկետի սահմաններում:

 

6.7.2.

Օպերատորը սեփական հայեցողությամբ կարող է ապառիկ հիմունքներով Ծառայություններ մատուցել Բաժանորդին, և, նման Ծառայություններից օգտվելու դեպքում, Բաժանորդը պարտավոր է սահմանված ժամկետում մարել մատուցված Ծառայությունների համար հաշվարկված գումարները:

 

6.7.3.

Մատուցված Ծառայություններին համապատասխանող գումարները ուղղակիորեն նվազեցվում են Անձնական հաշվի մնացորդից, և Օպերատորն ապահովում է հնարավորություն Անձնական հաշվի մնացորդն էլեկտրոնային կամ այլ եղանակով ստուգելու համար:

 

6.7.4.

Կանխավճարված գումարը սահմանված ժամկետում, որի տևողությունը ցանկացած դեպքում չի կարող գերազանցել 3 (երեք) տարին, ամբողջությամբ օգտագործված չլինելու դեպքում Օպերատորը կարող է սեփական հայեցողությամբ և առանց ծանուցման զրոյացնել Անձնական հաշվի մնացորդը:

 

6.7.5.

Բաժանորդը պարտավոր է սակագնային պլանով նախատեսված ժամկետներում կատարել կանխավճար («վերալիցքավորել» SIM քարտը) և այլ կիրառելի վճարումներ:

 

6.7.6.

Անձնական հաշվի վրա միջոցների բացակայության դեպքում Օպերատորը կարող է առանց ծանուցման արգելափակել ելքային հաղորդակցությունից և/կամ այլ Ծառայություններից օգտվելու հնարավորությունը:

 

6.7.7.

Սակագնային պլանով նախատեսված ժամկետում Անձնական հաշվի մնացորդի համալրմանն ուղղված վճարում չստանալու, ինչպես նաև անկախ պատճառներից` ելքային հաղորդակցությունների ավելի քան 6 (վեց) ամսվա ընթացքում անընդմեջ արգելափակված լինելու դեպքում Օպերատորը կարող է սեփական հայեցողությամբ, առանց որևէ ծանուցման, SIM քարտի սպասարկման դադարեցման միջոցով լուծել Պայմանագիրը:

 

6.7.8.

Կանխավճարների ստացման գործընթացը հեշտացնելու նպատակով, Օպերատորը կարող է թողարկել կանխավճարային (վերալիցքավորման) քարտեր կամ թույլատրել վճարման այլ եղանակներ:

 

6.7.9.

Կանխավճարված գումարները ենթակա չեն վերադարձման, բացառությամբ այն դեպքերի, երբ Ծառայությունների մատուցումը հնարավոր չէ:

 

6.8.

Հետվճարային (ապառիկ) բաժանորդագրության դեպքում, եթե այլ բան սահմանված չէ Օպերատորի կողմից.

 

6.8.1.

Օպերատորը պարտավոր է Բիլինգային համակարգի տվյալների հիման վրա պատրաստել ամսական ամփոփ հաշիվներ և դրանք հասանելի դարձնել համապատասխան սպասարկման կենտրոններին մինչև հաջորդ ամսվա 5-րդ օրը:

 

6.8.2.

Հաշիվները կարող են դուրս գրվել և պահվել էլեկտրոնային տեսքով:

 

6.8.3.

Սակագնային պլանով նախատեսված լինելու կամ Բաժանորդի կողմից պատվիրված լինելու դեպքում ամփոփ հաշիվները փոստով կամ էլեկտրոնային փոստով առաքվում են Բաժանորդին:

 

6.8.4.

Ցանկացած դեպքում Բաժանորդը պարտավոր է ինքնուրույն ճշտել իր ամսական պարտքը և մարել այն մինչև հաջորդ ամսվա 15-րդ օրը: 

 

6.8.5.

Վճարման պարտավորությունը համարվում է կատարված այն պահին, երբ վճարված գումարը հանձնվում է Օպերատորի դրամարկղ կամ` մուտքագրվում Օպերատորի բանկային հաշվին: Բանկային վճարումները, ինչպես նաև Օպերատորի գործակալների միջոցով կատարված վճարումները, արտացոլվում են Օպերատորի Բիլինգային համակարգում մինչև վճարման կատարման օրվան հաջորդող աշխատանքային օրվա ավարտը:

 

6.8.6.

Բաժանորդը պարտավոր է ժամանակին կատարել վճարումները` անկախ վճարման եղանակից, առաքված ամսական հաշվի ստացման փաստից, և հաշվի վերաբերյալ առարկություններ ներկայացնելու հանգամանքից:

 

6.8.7.

Վճարում կատարելիս` Բաժանորդը պարտավոր է վճարման փաստաթղթում ճշգրիտ նշել իր հեռախոսի համարը:

 

6.8.8.

Օպերատորը կարող է սեփական հայեցողությամբ և, մասնավորապես, Բաժանորդի վարկային պատմության ոչ բավարար լինելու դեպքում, կիրառել օգտագործման սահմանափակումներ:

 

6.8.9.

Բաժանորդը կարող է ուղղակի պարտագրման պայմանավորվածություններ ձեռք բերել Օպերատորի կողմից ընդունելի բանկի հետ, որով կլիազորի Օպերատորին գանձել ամսական հաշիվները Բաժանորդի բանկային հաշվից կամ վարկային քարտից և ստանալ տեղեկատվություն գանձված գումարների կամ գումարն ամբողջությամբ գանձելու անհնարինության մասին:

 

6.8.10.

Վճարումները սահմանված ժամկետում չստանալու և/կամ նախատեսված սահմանափակումները գերազանցելու դեպքում Օպերատորն իրավունք ունի առանց որևէ ծանուցման արգելափակելու ելքային հաղորդակցությունից և/կամ այլ Ծառայություններից օգտվելու հնարավորությունը: Վճարումը սահմանված ժամկետից հետո 2 (երկու) շաբաթվա ընթացքում չստանալու դեպքում Օպերատորն իրավունք ունի ամբողջությամբ կասեցնելու Ծառայությունները: Ծառայությունները մասամբ կամ ամբողջությամբ արգելափակելը/կասեցնելը հիմք չէ ամսական բաժանորդավճարը չհաշվարկելու համար:

 

6.8.11.

Այլ գրավոր համաձայնության բացակայության դեպքում Պայմանագիրը կհամարվի դադարեցված առանց որևէ ծանուցման անհրաժեշտության, եթե Բաժանորդը 2 (երկու) ամսվա ընթացքում չդիմի Օպերատորին ամբողջությամբ կասեցված Ծառայությունները վերականգնելու համար` անկախ Ծառայությունների կասեցման պատճառներից:

 

6.8.12.

Եթե Բաժանորդն օգտվում է մեկից ավելի Հեռախոսի համարներից և սահմանված ժամկետում ամբողջությամբ չի վճարել որևէ Հեռախոսի համարի ամսական հաշիվը, ապա Օպերատորը կարող է կիրառել 6.8.10. կետում նշված միջոցները Բաժանորդի բոլոր SIM քարտերի նկատմամբ:

 

6.8.13.

Օպերատորն իրավունք ունի օգտագործելու Բաժանորդի կողմից վճարված երաշխիքային դեպոզիտի գումարը Բաժանորդի ժամկետանց պարտքերը մարելու համար:

 

6.8.14.

Օպերատորն իրավունք ունի սեփական հայեցողությամբ ԱՄՆ դոլարով ինդեքսավորելու ժամկետանց վճարումների գումարները:

 

 

7.

 

7.1.

Բաժանորդը պարտավոր է Օպերատորի պահանջով և Օպերատորի կողմից ընդունելի եղանակով ներկայացնել հետևյալ փաստաթղթերը.

 

7.1.1.

Ֆիզիկական անձը` ՀՀ օրենսդրությամբ սահմանված անձը հաստատող փաստաթուղթ:

 

7.1.2.

Իրավաբանական անձը` պետական գրանցման վկայականի պատճենը` հաստատված իրավաբանական անձի կնիքով (եթե իրավաբանական անձն ունի կնիք), և իրավաբանական անձի անունից հանդես եկող անձի լիազորությունները և անձը հաստատող փաստաթղթերը:

 

7.2.

Անհատ ձեռնարկատերը պարտավոր է ներկայացնել պետական գրանցման վկայականի պատճենը` հաստատված անձի ստորագրությամբ, և անձը հաստատող փաստաթուղթ:

 

7.3.

Անհրաժեշտության դեպքում Օպերատորը կարող է Բաժանորդից պահանջել նաև այլ փաստաթղթեր կամ փաստաթղթերի նոտարական կարգով վավերացված պատճեններ:

 

7.4.

Եթե փաստաթղթերի տրամադրումը պահանջվել է Օպերատորի կողմից, ապա դրանցով հավաստվող տվյալների փոփոխության դեպքում Բաժանորդը պարտավոր է 1 (մեկ) ամսվա ընթացքում հայտնել այդ մասին Օպերատորին:

 

7.5.

Օպերատորը պարտավոր չէ վերականգնել կորցրած/հափշտակված SIM քարտը կամ SIM քարտին վերագրված Հեռախոսի համարը, եթե Օպերատորի մոտ Բաժանորդի անձնական տվյալները հաշվառված չլինելու պատճառով հնարավոր չէ հաստատել Բաժանորդի ինքնությունը:

 

 

8.

 

8.1.

Բաժանորդի մասին տվյալները, նրան մատուցված Ծառայությունների տեսակի, վայրի, ժամանակի և ծավալի մասին տեղեկությունները համարվում են գաղտնի և չեն բացահայտվում Օպերատորի կողմից, բացառությամբ այնպիսի դեպքերի, երբ դա պահանջվում է օրենքով կամ անհրաժեշտ է Օպերատորի իրավունքների պաշտպանության համար, այդ թվում` ժամկետանց պարտավորությունների զիջման դեպքում:

 

8.2.

Այլ գրավոր համաձայնության բացակայության դեպքում Օպերատորն իրավունք ունի փոխանցելու Բաժանորդի անհատական տվյալները և պարտքի չափի վերաբերյալ տեղեկությունները ՀՀ-ում գործող բանկերին, այլ ֆինանսական կազմակերպություններին` Բաժանորդի կամ նրա կողմից լիազորված անձանց կողմից պարտքի չափի ճշտում և վճարում կատարելու հնարավորության ստեղծման համար:

 

 

9.

 

9.1.

Բաժանորդը սեփական ռիսկով է օգտվում Օպերատորի և երրորդ անձանց կողմից մատուցվող ծառայություններից: Օպերատորը չի կարող որոշել ծառայությունների համապատասխանությունը Բաժանորդի կարիքներին:

 

9.2.

Յուրաքանչյուր Կողմ պատասխանատվություն է կրում Պայմանագրի կատարման ընթացքում մյուս Կողմին պատճառած իրական վնասների համար: Կողմերը հրաժարվում են և զերծ են պահում միմյանց անուղղակի վնասների և բաց թողնված օգուտների հատուցման պահանջներից:

 

9.3.

Օպերատորը պատասխանատվություն չի կրում տեխնիկական խափանման հետևանքով Ծառայությունների ընդհատման կամ այլ խափանման համար:

 

9.4.

Ցանկացած պարագայում Օպերատորի պատասխանատվությունը չի կարող գերազանցել Բաժանորդի կողմից փաստացի վճարված միջին ամսական գումարի` Օպերատորի մեղքով Ծառայություններից օգտվելու անհնարինության ժամկետին համապատասխան` համամասնորեն հաշվարկված գումարը:

 

 

10.

 

 

Կողմերը պատասխանատվություն չեն կրում Պայմանագրով պարտավորություններն ամբողջությամբ կամ մասամբ չկատարելու կամ դրանց կատարումն ուշացնելու համար, եթե դա հետևանք է ջրհեղեղի, հրդեհի, երկրաշարժի, այլ բնական աղետի, պատերազմական գործողության, զինված հարձակման, պայթյունի, զանգվածային խռովության, գործադուլի, պետական մարմնի կողմից ընդունված ակտի, մայրուղային ենթակառուցվածքների խաթարման, էլեկտրասնուցման կրճատման կամ թերացած Կողմի վերահսկողությունից դուրս այլ իրադարձության:

 

 

11.

 

 

Պայմանագիրը կարգավորվում և մեկնաբանվում է համաձայն Հայաստանի Հանրապետության գործող օրենսդրության նյութաիրավական նորմերի:

 

 

12.

 

 

Պայմանագիրը կնքվում է հայերեն լեզվով: Բաժանորդի հարմարության համար Պայմանագիրը, ինչպես նաև կիրառվող սակագները և կանոնները կարող են թարգմանվել և հրապարակվել նաև այլ լեզուներով, սակայն նման թարգմանությունների և հայերեն տարբերակի միջև որևէ անհամապատասխանության դեպքում գերակայում է հայերեն տարբերակը:

 

 

13.

 

13.1.

Բաժանորդը պարտավոր է ստուգել և Օպերատորին գրավոր հայտնել ամսական հաշիվներում տեղ գտած անհամապատասխանությունների մասին Ծառայությունների մատուցման համապատասխան ամսվա ավարտից հետո 45 (քառասունհինգ) օրվա ընթացքում, և եթե սահմանված ժամկետում Բաժանորդը որևէ անհամապատասխանության մասին չի հայտնել Օպերատորին, ապա հաշիվը համարվում է Բաժանորդի կողմից անվերապահորեն հաստատված և ընդունված, և Օպերատորը չի ընդունի այդ հաշվի ժամանակահատվածին վերաբերող որևէ հետագա պահանջներ և առարկություններ:

 

13.2.

Դժգոհություններ կամ առաջարկներ ունենալու դեպքում Բաժանորդը կարող է դիմել Օպերատորին` ներկայացնելով գրություններ, այդ թվում` էլեկտրոնային փոստով, այցելելով Օպերատորի սպասարկման կենտրոններ կամ զանգահարելով Օպերատորի «թեժ գիծ» շուրջօրյա ծառայություն: Օպերատորը իր կողմից սահմանված կանոնների համաձայն ընդունում է բողոքների և առաջարկների վարման ներքին ընթացակարգեր, որոնք փակցվում են սպասարկման կենտրոններում և տեղադրվում Օպերատորի վեբ կայքում: Օպերատորը պարտավոր է արձագանքել ստացված բողոքներին և առաջարկներին իր կողմից ընդունված ընթացակարգերով սահմանված ժամկետներում և կարգով: Բաժանորդի պահանջով գրավոր բողոքներին և առաջարկներին պետք է տրվի գրավոր պատասխան:

 

13.3.

Կողմերը պետք է ձգտեն լուծել ծագած վեճերը բարյացակամորեն` բանակցությունների և խորհրդակցությունների միջոցով: Փոխադարձ համաձայնության չգալու դեպքում վեճերն ընդդատյա են Հայաստանի Հանրապետության իրավասու դատարաններին: Պայմանագրի յուրաքանչյուր Կողմ իրավունք ունի վեճերի լուծման համար դիմելու 15-րդ կետում նշված` Օպերատորի գլխամասային գրասենյակի գտնվելու վայրի դատարաններին:

 

 

14.

 

14.1.

Սույն Պայմաններն ուժի մեջ են մտնում 2011թ.-ի սեպտեմբերի 10-ից: Նշված ամսաթվից Օպերատորի կողմից նախկինում կատարված կանխավճարային և հետվճարային ծառայությունների մատուցման հրապարակային օֆերտան («Շարժական կապի ծառայությունների մատուցման ընդհանուր պայմաններ») համարվում է ուժը կորցրած, և բոլոր նոր բաժանորդագրությունները պետք է կարգավորվեն սույն Պայմաններով:

 

14.2.

Սույն Պայմաններն ուժի մեջ մտնելու օրվա դրությամբ գործող սակագնային պլանները և Ծառայությունների մատուցման այլ պայմանները և կանոնները մնում են ուժի մեջ:

 

14.3.

Այլ բան սահմանված չլինելու դեպքում Պայմանագիրը համարվում է կնքված անորոշ ժամկետով:

 

14.4.

Բաժանորդն իրավունք ունի միակողմանիորեն լուծելու Պայմանագիրը` այդ մասին առնվազն 5 (հինգ) օր առաջ կամ Օպերատորի կողմից ընդունելի այլ ժամկետում գրավոր ծանուցելով Օպերատորին և կատարելով վերջնահաշվարկ փաստացի մատուցված Ծառայությունների համար:

 

14.5.

Օպերատորն իրավունք ունի միակողմանիորեն լուծելու Պայմանագիրը` Բաժանորդի կողմից Պայմանագրի պայմանների խախտման դեպքում, ինչպես նաև օրենքով, Պայմանագրով, սակագնային պլանով կամ Օպերատորի կողմից սահմանված այլ կանոններով նախատեսված դեպքերում:

 

14.6.

Պայմանագրի լուծման դեպքում Բաժանորդը պարտավոր է անհապաղ մարել բոլոր պարտավորությունները Օպերատորի նկատմամբ:

 

14.7.

Պայմանագրի լուծման հետևանքով և/կամ օրենսդրությամբ սահմանված այլ հիմքերով Հեռախոսի համարի ազատման դեպքում Օպերատորն իրավունք ունի սեփական հայեցողությամբ օգտագործելու այն:

 

14.8.

Օպերատորը կարող է սեփական հայեցողությամբ կատարել հրապարակային առաջարկ (օֆերտա) Պայմանագրի պայմանները, այդ թվում` կիրառվող սակագնային պլանները, սակագները և կանոնները փոփոխելու մասին` այդ փոփոխություններն առնվազն 3 (երեք) օր առաջ Օպերատորի պաշտոնական վեբ կայքում հրապարակելու և սպասարկման կենտրոններում հայտարարելու, ինչպես նաև. անհրաժեշտության դեպքում` այդ մասին Հայաստանի Հանրապետությունում լայն տարածում ունեցող առնվազն մեկ զանգվածային լրատվամիջոցում հրապարակային հայտարարություն տեղադրելու միջոցով:

 

14.9.

Պայմանագրի 14.8. կետի համաձայն առաջարկված փոփոխությունների հետ համաձայն չլինելու դեպքում Բաժանորդն իրավունք ունի միակողմանի կարգով դադարեցնելու Պայմանագիրը` մինչև փոփոխությունների ուժի մեջ մտնելու համար նախատեսված ժամկետը` այդ մասին գրավոր և/կամ Օպերատորի կողմից ընդունելի այլ եղանակով ծանուցելով Օպերատորին, իսկ եթե նշված ժամկետում այդպիսի ծանուցում ստացված չէ Օպերատորի կողմից և Բաժանորդը շարունակում է օգտվել Ծառայություններից, ապա փոփոխություններ կատարելու մասին Օպերատորի առաջարկը կհամարվի Բաժանորդի կողմից գործողությամբ ընդունված (ակցեպտավորված):

 

 

15.

 

 

«Ղ-Տելեկոմ» փակ բաժնետիրական ընկերություն

Հայաստանի Հանրապետություն, ք. Երևան 0015, Արգիշտի 4/1

ՀՎՀՀ 01551651, Հ/հ 247011333330 «Արդշինինվեստբանկ» ՓԲԸ-ում

Վեբ կայք` www.vivacell.am, www.mts.am